Aqyarda fevralnıñ 11-nde 86 yañı koronavirus hastası qayd etilgen, aynı zamanda 76 adam tüzelgen soñ hastahaneden çıqarılğan. Bu aqta Rusiye nezaretinde olğan şeer memuriyetiniñ matbuat hızmeti haber ete.
“65 yaştan 90 yaşqa qadar dört hasta öldi. Pandemiya başlağanından berli Aqyarda 10740 kişi hastalandı. Şimidiki vaqıtta 9579 hasta tedaviylendi ve 433 öldi”, – dep haber etile bildirmede.
Berilgen malümatqa köre, COVID-19 diagnozı tasdıqlanğan 351 insan hastahanelerde yata, alı yengil hastalar bölüginde 57 kişi buluna, 751 adam közetile.
Hatırlatamız ki, Qırımda keçken künü 149 yañı koronavirus hastası qayd etildi. Pandemiya başlağanından berli Qırımda resmiy şekilde 33977 hasta qayd etilgen, 29613 tüzelgen ve 839 ölgen.
Qırımda COVID-19 hastalarınıñ sayısı eksilmege devam etse, koronavirus pandemiyası sebebinden kirsetilgen sıñırlav tedbirleri baarge doğru lâğu etilecek, dep bildirdi fevralniñ 10-nda Qırımnıñ Rusiye yolbaşçısı Sergey Aksönov COVID-19 ile küreş operativ ştabınıñ toplaşuvında.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
