Aqyarda yanvarniñ 25-nde saba 99 yañı COVID-19 hastası qayd etildi, 64 yaştan 90 yaşqa qadar beş kişi vefat etti, tüzelgen 68 insan hastahaneden çıqarıldı. Bu aqta şeerniñ Rusiye ükümetiniñ matbuat hızmeti bildire.
«Umumen Aqyarda 9105 kişi yañı koronavirus yuqunçına oğradı. 8220 insan tüzeldi, 366 kişi vefat etti. Bugünki künde COVID-19 tasdıqlanğan 331 insan hastahanelerde buluna. Alı yengil hastalar bölüginde 155 kişi buluna. 674 insan közetile – bu insanlar hastalarnen alâqada oldı, amma COVID-19 diagnozları tasdıqlanmadı», – dep aytıla haberde.
Akimiyetniñ malümatına köre, 1742 insanğa COVID-19 aşısı yapıldı, 560 kişi ekinci kere aşı oldı, şimdi oca ve tibbiyet hadimleri aşı ala.
Keçken künü Qırımda 192 yañı koronavirus hastası qayd etildi, 7-siniñ hastalıq alâmetleri yoq, pandemiya vaqtında Qırımda 711 insan COVID-19-dan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
