Yanvarnıñ 12-nde Aqyarda 93 yañı koronavirus hastası qayd etilgen, 69 adam tüzelgen soñ hastahaneden çıqarılğan, 27 yaşından 83 yaşına qadar 4 adam ölgen. Bunı şeerniñ Rusiye ükümeti haber etti.
“Umumen paydemiyanıñ başından Aqyarda 7846 insan yañı koronavirus yuqunçına oğradı, 7076 insan tedaviylendi, 291 öldi. Bugünde tasdıqlanğan COVID-19 ile 276 hasta statsionarlarda, yengil hastalar içün bölükte 282 kişi yata”, – dep yazıla beyanatta.
Hastalarnen alâqada olğan, amma COVID-19 diagnozı tasdıqlanmağan 525 kişi közetile
Qırımnıñ Sağlıq saqlav nazirliginiñ malümatına köre, yanvarnıñ 11-nde Qırımda 184 yañı hasta qayd etildi. Pandemiya başlanğanından berli Qırımda umumen 27967 COVID-19 hastası qayd etilgen, 22222 kişi tedaviylengen soñ yiberilgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
