Aqyarda noyabrniñ 11-nde saba 61 yañı COVID-19 hastası qayd etildi. 24 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna. Bu aqta şeerniñ Rusiye ükümeti haber ete.
Akimiyetniñ malümatına köre, hastalar – 20 yaşından 90 yaşına qadar yerli sakinler.
«74 yaşında er adamı ve 92, 73 ve 68 yaşlarında qadınlar vefat etti», – dep aytıla haberde.
Aqyar ükümeti bugün COVID-19 diagnozı tasdıqlanğan 330 İnsan hastahanelerde buluna, dep bildire: 164-ü yuqunç hastahanesinde, 163-ü doquzıncı şeer hastahanesinde, üçü Mudafaa nazirliginiñ hastahanesinde, 35 kişi «İzumrudda», 66 insan ambulator tedaviylevde.
«652 insan közetile – bu insanlar hastalarnen alâqada oldı, amma COVID-19 diagnozı tasdıqlanmağan», – dep aytıla haberde.
«Solnışko» pansionatı observator rejiminde çalışa.
Akimiyetniñ malümatına köre, yılnıñ başından Aqyarda 3251 insan yañı koronavirus yuqunçına oğradı, 83 kişi vefat etti.
Keçken künü Qırımda daa üç hasta koronavirustan vefat etti, pandemiya devamında, Qırım akimiyetiniñ malümatına köre, 188 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
