Oktâbrniñ 20-nde saba Aqyarda 50 yañı COVID-19 hastası qayd etildi, dep bildire şeerniñ Rusiye ükümeti.
«Hastalar – 14 yaşından 94 yaşına qadar yerli sakinler. Yılnıñ başından Aqyarda 1690 insan yañı koronavirus yuqunçına oğradı. 1095 insan tüzeldi, 51 kişi vefat etti», – dep aytıla haberde.
Şeer akimiyetiniñ malümatına köre, Aqyar hastahanelerinde COVID-19 diagnozı tasdıqlanğan 301 insan buluna: 124 kişi yuqunç hastahanesinde, 169 kişi doquzıncı şeer hastahanesinde, sekiz kişi – Mudafaa nazirliginiñ gospitalinde, 69 insan – «İzumrud» pansionatında.
«409 insan közetile – hastalarnen alâqada olğanlar, COVID-19 qayd etilmedi», – dep bildirdi müessise.
Qırımda keçken künü 163 koronavirus hastası qayd etildi. Qırımda 7333 yañı koronavirus hastası qayd etildi, 114-ü çetelden keldi, 128-i qomşu Rusiyeden kelgenler ve olarnen alâqada olğanlar, 4021 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
