Aprelniñ 1-nde saba Aqyarda 33 yañı COVID-19 hastası qayd etildi, 22 insan yiberildi. Bu aqta Kreml kontrolindeki Aqyar ükümetiniñ saytında haber etile.
«80 ve 82 yaşında eki insan vefat etti. Umumen Aqyarda 13 261 insan yañı koronavirus yuqunçına oğradı. 12 232 kişi yahşı oldı, 564 insan vefat etti», – dep aytıla haberde.
Berilgen malümatqa köre, 631 insan közetile.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel bildirilgenine köre, işğal altındaki Aqyarda akimiyet koronavirus pandemiyası sebebinden kirsetilgen sıñırlavlarnı aprelniñ 30-na qadar uzattı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
