Keçken künü Aqyarda 20 yañı COVID-19 hastası qayd etildi. Bu aqta Aqyarnıñ Rusiye ükümeti haber ete.
«Hastalar – eki yaşından 87 yaşına qadar insanlar, episi – yerli sakin. 73 yaşında adamnıñ ölümi qayd etildi. Hastalıqnen beraber ağır eki taraflı virus pnevmoniyası ve yürek-damar sistemasınıñ hronik hastalıqlarnen beraber aqcigerleri şişti», – dep aytıla haberde.
Akimiyetniñ malümatına köre, al-azırda şeer hastahanelerinde 303 insan buluna, 245 kişi yuqunç hastahanesinde közetile, 197 insan №9 şeer hastahanesinde yata. 491 insan yaşağan yerde közetile.
Berilgen malümatqa köre, yılnıñ başından Aqyarda 1033 insan yañı koronavirus yuqunçına oğradı, 659 insan tüzeldi, 28 kişi vefat etti.
Qırımda keçkeg künü 93 yañı koronavirus hastası qayd etildi. Umumen Qırımda, akimiyetniñ malümatına köre, 4557 yañı koronavirus hastası qayd etildi, 105-i çetelden keldi, 128-i qomşu Rusiyeden kelgenler ve olarnen bağda olğanlar, 2857 insan tüzeldi. 66 kişi koronavirustan vefat etti. Yılnıñ başından Aqyarda 1013 insan yañı koronavirus yuqunçına oğradı. 641 insan tüzeldi, 27 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
