Noyabrniñ 19-nda saba 59 yañı COVID-19 hastası qayd etildi. Olardan 17 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna, dep bildiredi şeerniñ Rusiye başlıqları.
“Hastalar – 2 yaşından 80 yaşına qadar yerli sakinler. 123 kişi tedaviylengen soñ hastahaneden çıqarıldı. Şeerde yılnıñ başından 3695 adam yañı koronavirus yuqunçına oğrağan, 99 ölgen”, –dep yazıla bildirmede.
Akimiyetniñ malümatına köre, bugünki künde COVID-19 diagnozı tasdıqlanğan 277 kişi hastahanede, 255 insan ambulator tedaviylevde buluna, 580 kişi közetile.
Tünevin Qırımda 214 yañı koronavirus hastası qayd etilgen edi. Pandemiya başlağanından episi olıp 12947 Covid-19 hastası qayd etilgen, 228 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı
