Keçken künü Aqyarda daa 51 yañı koronavirus hastası qayd etildi, hastalar – 14 yaşında 88 yaşına qadar yerli sakinlerdir. COVID-19 tasdıqlanğan üç kişi vefat etti. Bu aqta şeerniñ Rusiye ükümeti haber ete.
«77, 69 ve 58 yaşında üç er adamı vefat etti. Er birinde hronik hastalıqlarnen beraber eki taraflı virus-bakterial pnevmoniyası oldı. Yılnıñ başından Aqyarda 1640 insan yañı koronavirus yuqunçına oğradı. Şimdige qadar 1054 kişi tüzeldi, 51 insan vefat etti», – dep aytıla haberde.
Qayd etilgenine köre, 313 insan yuqunç hastahanesinde buluna, 177 kişi doquzıncı şeer hastahanesinde yata, daa beş kişi – Mudafaa nazirliginiñ gospitalinde, 81 insan – observator rejiminde çalışqan «İzumrud» şivahanesinde.
«377 insan közetile – hastalarnen alâqada olğan insanlar, COVID-19 tasdıqlanmağan. «Solnışko» pansionatı observator rejiminde çalışa», – dep qoştı matbuat hızmeti.
Oktâbrniñ 18-i sabasına qadar Aqyarda 47 yañı COVID-19 hastası qayd etilgen edi. Yılnıñ başından, akimiyetniñ malümatına köre, Aqyarda 1589 insan yañı koronavirus yuqunçına oğradı, 1034 kişi yahşı oldı, 48 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
