Ukrainada tünevin 1271 yañı COVID-19 adisesi qayd etildi, bunı Milliy Telükesizlik ve Mudafaa Hızmetiniñ malümatı köstere. Bir künde 24 adam vefat etti, 914 adam yahşı oldı, bildire Azatlıq.Radiosı.
Avgustnıñ 4-ünde hastalarnıñ çoqusı Lviv, Ivano-Frankivsk, Harkiv vilâyetlerinde ve Kyivde tasdıqlandı.
Pandemiyanıñ başlağanından berli Ukrainada koronavirus hastalarınıñ sayısı tahminen 75 500 adam oldı, 40 500-den ziyade hasta yahşı oldı, 1788-i elâk oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
