Qırımnıñ Rusiye yolbaşçısı Sergey Aksenov oktâbrniñ 30-ndan noyabrniñ 7-ne qadar raatlıq künlerini ilân etti.
«Oktâbrniñ 30-ndan noyabrniñ 7-ne qadar Prezidentniñ buyruğına köre Qırım Cumhuriyetinde raatlıq künleri ilân etile, hadimlerniñ aylıqları saqlana», – dep yazdı Aksenov içtimaiy ağlarda.
Onıñ aytqanına köre, bu raatlıq künleriniñ maqsadı – yañı epidemiya dalğasını toqtatmaq.
«Vaqtınca kirsetilgen sıñırlavlarğa añlap yanaşmağa rica etem, raatlıq künleri tabiatqa ya da başqa regionlarğa barmaqtan, insanlarnen raatlanmaqtan vazgeçmege, bağlarını eksiltmege ve, ebet, kerekli epidemiologik telükesizlik tedbirlerine riayet etmege rica etem – olar qolay ve er kes olarnı yahşı bile», – dep yazdı Aksenov ve bu müddet devamında koronavirus aşılarını yaptırmağa çağırdı.
Rusiye prezidenti Vladimir Putin oktâbrniñ 30-ndan noyabrniñ 7-ne qadar raatlıq künlerini ilân etti. Akimiyet eali arasında virusnıñ tarqaluv zıncırlarını toqtatmaq içün böyle tedbir aldı.
Keçken künü Qırımda 621 COVID-19 hastası qayd etildi, bu pandemiya vaqtında daa bir rekord ola. Qırım akimiyeti epidemiologik vaziyet fenalaşqanı sebebinden yarımadada koronavirus yuqunçı ile küreş tedbirlerini quvetleştirdi.
Qırımnıñ Rusiye sağlıq nazirligi qayd etkenine köre, oktâbrniñ 20-ne qadar 560 528 insan ya da 46,2% birinci aşısını yaptırdı,515 037 kişi ya da 42,5% kişi ekinci aşısını yaptırdı, daa tahminen 700 biñ kişi koronavirus aşısını yaptırmalı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
