İlk yaznıñ 15-ne keçer gecesi Çonğar civarındaki köpür kene ücümge oğradı, Geniçesk ve Arabat Beli arasındaki köpür de. Rusiye tarafından tayin etilgen Herson vilâyetiniñ işğal etilgen qısmınıñ yolbaşçısı Vladimir Saldonıñ bildirgenine köre, bu köpürlerden Qırımğa ve keri areket qapatıldı.
"Gece ücüminden soñ Çonğar civarındaki köpür kene zararlandı. "Canköy" uçaq alanı boyunca areket bütünley qapatıldı. Gece Genicesk ile Arabat belini birleştirgen köpürge de darbe endirildi. Yol areketi toqtatıldı", — dep yazdı Saldo içtimaiy ağlardaki saifelerinde.
Bundan evel "Krımskiy vetr" telegram kanalı uydu çekimleriniñ malümatına atıf eterek, bu köpürlerge ücüm etile bilecegini haber etken edi. NASA Firms hızmetiniñ kameralarında bu obyektlerniñ yanında yanğınlar qayd etile. Köprülerniñ zarar körgenine qıymet kesmek şimdilik mümkün degil.
Ukrayina arbiyleri bu darbelerni izaatlamadı. Rusiye Mudafaa nazirliginde bildirdiler ki, İlk yaznıñ 15-nde gece Rusiyeniñ bir sıra regionları, em de işğal etilgen Qırım ve Qara ve Azaq deñizleri üzerinde 123 Ukrayin uçucısız uçaq yoq etildi. Müessise zarar körgenleri ya da ğayıp olğanları aqqında haber etmedi, urulğan dronlar aqqında malümatnı tasdıqlamadı.