Ukrayına Silâlı quvetleriniñ Baş ştabı Ukrayına ordusı Çonğar köprüne qarşı Storm Shadow raketalarınen ücüm etkenini tasdıqladı. Bu aqta Ukrayına silâlı quvetleriniñ Baş ştabı Baş operativ idaresiniñ yolbaşçı muavini Oleksiy Ğromov «Ukrinformğa» bergen intervyüsında ayttı.
«Çonğar yaqınlarında Sivaş köprüleriniñ zarar körmesi bu çeşit qanatlı raketalarnıñ semereligini isbatladı, bu da duşmannıñ silâ ve diger tehnik vastalarnen temin etilüvini qıyınlaştırdı. Bu raketalar yardımınen idare noqtaları ve duşmannıñ tehnik vastaları saqlanğan yerler ateş tesiri altında qala», – dep tarif etti o.
250 kilometrge qadar mesafede nişanlarğa yetmege imkân bergen Storm Shadow raketalarınıñ berilüvi aqqında mayısta belli oldı.
İyünniñ 22-nde saba Ukrayınanıñ işğal etilgen topraqları Rusiye akimiyeti Çonğar köprüne açılğan ateş aqqında bildirdi. Rusiyeliler tayin etken Herson vilâyetiniñ işğal etilgen qısmınıñ yolbaşçısı Vladimir Saldo Çonğar köprüne Strom Shadow raketalarınen ücüm etildi. Rusiye Tahqiqat komiteti Çonğar köprüne dört raketadan ateş açıldı, dep bildirdi.
Qırımnıñ Rusiye akimiyeti Çonğar yönelişinden areketni Ermeni Bazar ve Perekop keçiş noqtalarına aylandırdı.
Rusiye prezidentiniñ memuriyeti Çonğar köprüne yapılğan darbeni izaatlamadı. «Mudafaa nazirliginiñ meselesidir», – dep qayd etti Dmitriy Peskov.
Herson vilâyetiniñ bir qısmında işğalci akimiyetniñ yolbaşçısı Vladimir Saldo Çonğar köprü ücümden körgen zararı tüşünilgeninden çoq oldı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
