Qırımda tamir etilgen Çonğar köpründe maşina areketi yañıdan başlatıldı. Bu aqta Rusiye kontrolindeki Qırımnıñ yük taşıyıcıları ve ekspeditorları birliginiñ yolbaşçısı Anatoliy Tsurkin bildirdi.
«Aytqanımız kibi. Areket evelden aytılğan müddet içinde yañıdan başlatıldı. Canköy keçiş noqtası kene çalışa», – dep qayd etti o.
Aynı vaqıtta, Qırımnıñ Rusiye yolbaşçısınıñ mesleatçısı Oleg Krüçkov «bu Rusiye naqliyat nazirligi ve bağlı müessiseleriniñ işi» dep, «bloger ve cemaatçılarnıñ» malümatını tarqatmamağa çağırdı.
İyülniñ 29-nda Ukrayına Silâlı quvetleri bir qaç kün evelsi vaqtınca işğal etilgen Qırımda Çonğardaki köpürge Storm Shadow raketalarınen ücüm etti, dep tasdıqladı.
İyünniñ 22-nde saba işğal etilgen Ukrayına topraqlarınıñ Rusiye akimiyeti Çonğar köprüne ateş açıldı, dep bildirgen edi. Rusiyeliler tayin etken Herson vilâyetiniñ işğal etilgen qısmınıñ yolbaşçısı Vladimir Saldo Çonğar köprüne Strom Shadow raketalarınen ücüm etildi. Rusiye Tahqiqat komiteti Çonğar köprüne dört raketadan ateş açıldı, dep bildirdi.
Ukrayına cenübiniñ mudafaa spikeri Natalâ Ğumenük Çonğar köprü zarar körgen soñ Rusiye işğalcileriniñ logistikası bozulacaq, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
