Çonğar köprü zarar körgen soñ Rusiye arbiyleriniñ logistikası bozulacaq, dep bildirdi Ukrayına cenübiniñ mudafaa quvetleriniñ birleşken matbuat merkeziniñ yolbaşçısı Natalâ Ğumenük.
«İşimizni devam ettiremiz. Er şey aytqan planımızğa köre kete. Duşmannı boldurtmaq pek müim, yedeklerini toldurmaq imkânlarından marum etmek pek müim, tez özüne kelip, yardım almağa imkân bermemeli… Duşmannıñ planlarını bozamız… Logistika bozulacaq, onı temin etüv imkânları pek az. Bu duşmannıñ tek maneviy degil, maddiy alına da tesir ete», – dep ayttı o, Ukrayına milliy telemarafonınıñ yayınında.
İyünniñ 22-nde saba işğal etilgen Ukrayına topraqlarınıñ Rusiye akimiyeti Çonğar köprüne ateş açıldı, dep bildirdi. Rusiyeliler tayin etken Herson vilâyetiniñ işğal altındaki qısmınıñ yolbaşçısı Vladimir Saldo aytqanına köre, Çonğar köprüne Storm Shadow raketalarından ateş açıldı. Rusiyeniñ Tahqiqat komiteti Çonğar köprüne dört raketadan ateş açıldı, dep bildirdi.
Qırımnıñ Rusiye akimiyeti Çonğar yönelişinden areketni Ermeni Bazar ve Perekop keçiş noqtalarına aylandırdı.
Rusiye prezidentiniñ memuriyeti Çonğar köprüne yapılğan darbeni izaatlamadı. «Mudafaa nazirliginiñ meselesidir», – dep qayd etti Dmitriy Peskov.
Rusiye Mudafaa naziri Sergey Şoygu Ukrayına ordusınıñ reberligi Qırımğa HIMARS toplu ateş reaktiv sistemaları ve Storm Shadow qanatlı raketalarınen darbe endirmege planlaştıra, dep bildirdi. O, Ukrayınada «qararlar alınğan merkezlerge qarşı tez darbelerge» yol açılacaq, dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
