Rusiye Federatsiyasınıñ Tahqiqat komiteti iyünniñ 22-nde Çonğar köprüne dört raketadan ateş açıldı, dep bildire.
«İlk malümatqa köre, belli olmağan dört raketa qayd etildi», – dep bildire Rusiye Federatsiyası Tahqiqat komitetiniñ arbiy tahqiqat idaresiniñ vekiliniñ aytqanlarını TASS devlet haber agentligi.
Bundan ğayrı, müessise köpürge Frenkistanda yapılğan raketalardan ateş açıldı, dep israr ete. Bunı adise yerinde tapılğan parçalar isbatlay eken.
Bu malümatnı mustaqil menbalar vastasınen tasdıqlamaq ya da inkâr etmek imkânsız ola.
İyünniñ 22-nde saba işğal etilgen Ukrayına topraqlarınıñ Rusiye akimiyeti Çonğar köprüne ateş açıldı, dep bildirdi. Rusiyeliler tayin etken Herson vilâyetiniñ işğal altındaki qısmınıñ yolbaşçısı Vladimir Saldo aytqanına köre, Çonğar köprüne Storm Shadow raketalarından ateş açıldı.
Qırımnıñ Rusiye akimiyeti Çonğar yönelişinden areketni Ermeni Bazar ve Perekop keçiş noqtalarına aylandırdı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
