Rusiye kontrolindeki Qırım yolbaşçısı Sergey Aksenov iyünnin 22-nde gece Çonğar köprüne ateş açıldı, dep bildirdi.
«Gece Çonğar köprüne darbe endirildi. Yaralanğanlar yoq. Şimdi silânı añlamaq içün mütehassıslar ekspertiza keçire. Hızmetler yolnı teşkerip başladı», – dep yazdı Rusiye kontrolindeki Qırım yolbaşçısı Sergey Aksenov Telegram kanalında.
Rusiyeliler tayin etken Herson vilâyetiniñ işğal altındaki qısmınıñ yolbaşçısı Vladimir Saldo aytqanına köre, Çonğar köprüne Storm Shadow raketalarından ateş açıldı.
«İlk malümatqa köre, Storm Shadow ingliz raketaları qullanıldı. Köpürlerde yol zarar kördi. İnsanlar yaralandı. Duşmannıñ er bir adımına cevabımız bar. Herson vilâyeti ve Qırım arasında seferler devam ete – areket vaqtınca yedek yoldan kete», – dep yazdı Saldo Telegram kanalında.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
