Uçucısızlar iyünniñ 9-na keçer gecesi Rusiye tarafından işğal etilgen Qırımnı Rusiye ordusı kontrol etken Herson vilâyetinen birleştirgen Çonğar köprüne ücüm etti. Köpür zarar kördi, areket vaqtınca toqtatıldı, dep bildirdi Herson vilâyetiniñ işğalci yolbaşçısı Vladimir Saldo.
Onıñ aytqanına köre, ava mudafaa vastaları köpürge yaqınlaşqan 20-den ziyade uçucısıznı urdı. Umumen ücümde iştirak etken dronlarnıñ sayısı aydınlatılmay.
Ukrayina arbiyleri iyünniñ 7-nde Çonğarda köpürge ücüm etti. Qırım ve Herson vilâyetiniñ idariy sıñırındaki "Canköy" maşina keçiş noqtası vaqtınca qapatıldı.
Ukrayina arbiyleri yañı darbeni şimdilik izaatlamay.
Hatırlatamız, bundan evel Vladimir Saldo Qırım tarafına ketken yük maşinalarınıñ areketini sıñırlağan edi. R-280 yolu rusiyeliler içün Keriç köprüniñ alternativası oldı. 630 km-den ziyade "qara ayatı" işğal etilgen Mariupol ve Melitopolden keçip, Rusiyeniñ Rostov-na-Donu şeerini işğal etilgen Qırımnıñ paytahtı Aqmescitnen bağlay.
Ukrayina mudafaa quvetleri mayısnıñ ekinci yarısında bu yolğa qarşı darbelerini quvetleştirdi, Qırım yarımadasında yaqarlıq qıtlığı başladı. İyünniñ 4-nden başlap Qırımda naqıtnen almaq yasaq. Bir kişige eñ ziyade 20 litr tek talonnen satıla, talonlar da az.
Yarımadanıñ Rusiye akimiyeti yaqarlıq qıtlığını çeşit yollarnen çezmege tırışa. Aqyarda aftada 1 kere maşinağa 20 litr benzin toldurmağa imkân bergen bir QR-kod Max Rusiye messencerinde yapıldı. Olarnı da pek tez alalar.