Hollywood aktörı George Clooney ve onıñ apayı, yurist Amal Clooney tarafından tesis etilgen «Adalet içün» Clooney Faqfı, Rusiyeni, Rusiye Fedartsiyasında ve işğal etilgen Qırımda yasaq etilgen «Hizb ut-Tahrir» teşkilâtınıñ faaliyetinde iştirak etüvnen qabaatlanğan Bağçasaray «Hizb ut-Tahrir davası» mabüsleri Server Mustafayev, Ernes Ametov, Marlen Asanov, Memet Belâlov, Server Zekiryayev, Timur İbragimov, Seyran Saliyev ve Edem Smailovnıñ ükmüni lâğu etmesine çağırdı.
«Bu şahıslarnıñ mahkemesi adaletli mahkeme aqlarınıñ ve diger insan aqlarınıñ bozulması ile keçti. Olarnıñ arasında qabaatsızlıq prezumptsiyası aqqı, makeme davasınıñ baqılmasında iştirak etme ve özüni mudafaa etme aqqı, şaatlarnı çağırma ve sorğuğa çekme aqqı, qanunsız ve esassız yaqalavdan azat olma aqqı. Bu bozuvlarnı köz ögüne alıp, Vlasiha şeeriniñ Arbiy istinaf mahkemesi yuqarıda añılğan şahıslarğa çıqarılğan ükümni lâğu etmeli ve olarnıñ deral azat etilmesi aqqında qarar çıqarmalı», – dep yazıla faqıfnıñ beyanatında.
Bu davanıñ halqara standartlarğa köre uyğun talili ve qıymetlendirilmesi ile «İnsan aqları elçiligi» tatarfından kerçekleştirilgen bütün mevcud oturışlarnıñ monitoringine esaslanğan esabatnıñ tolu metini bu bağlatı boyunca oqumaq mümkün.
Müellifler, Grajdan ve siyasiy aqlarğa dair halqara añlaşma, İnsan aqları Avropa şartnamesi ve Dörtünci Jenava Şartnamesine çerçivesindeki mecburitelerini yerine ketirmek içün Rusiyeniñ deral yedi mahkümni azat etmek kerek olğanını qayd eteler.
«Bundan ğayrı Rusiye Federatsiyası işğal etilgen topraqlarda Rusiye qanunları çerçivesinde Ukraina vatandaşlarınıñ taqip etilmesini ve yaqalanğanlarnıñ Rusiye topraqlarına qanunsız etap etilmesini toqtatmalı», – dep yazıda esabatta.
Hollywood aktörı George Clooney ve onıñ apayı, yurist Amal Clooney tarafından tesis etilgen «Adalet içün» Clooney Faqfı, «adalet içün küreş ve insan aqları bozulması içün mesuliyetke çekmeni» öz vazifesi olaraq taqdim ete. Fond bütün dünyada çeşit-türlü uquq qoruyıcı leyhalarnı kerçekleştire.
2020 senesi Clooney Fondu, Bağçasaray «Hizb ut-Tahrir davası» boyunca Rusiye mahkemesiniñ qararını tenqit etti.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
