Hollywood aktörı George Clooney ve ömür arqadaşı Amal Clooney tarafından qurulğan "Adalet içün" Clooney Fondu, Bağçasaray "Hizb ut-Tahrir davası" boyunca Rusiye mahkemesiniñ qararını tenqit etti.
"Evelleri "Adalet içün" Clooney Fondu artıq Rusiyede Server Mustafayevge qarşı mahkeme protsessinde onıñ adaletli mahkeme baqıluvına aqqı bir çoq kere bozulğanını bildire edi. Endi ise mahkeme, adaletsiz mahkeme qararını çıqarıp, sekiz dava iştirakçilerinden yedisini uzun müddetlerge - 13-ten 19 yılğa qadar -- maküm etti", - denile Fondnıñ beyanatında.
Clooney Fondu qayd ete ki, qabaatlav tarafınıñ davanıñ öz versiyasını taqdim etmek içün altı ay vaqtı olsa da, qabaatlanğanlarğa bunıñ içün eki aydan az vaqıt berildi.
"İnsan Aqları Elçiligi" keçirgen bütün bu dava protsessiniñ halqara standartlarğa köre talil ve qıymet kesmesi yaqın vaqıtta trialwatch.com saytında taqdim etilecegini bildirdi.
Hollywood aktörı George Clooney ve ömür arqadaşı Amal Clooney tarafından qurulğan "Adalet içün" Clooney Fondu, "adalet içün küreş ve insan aqları bozulması içün mesuliyetke çekmeni" öz vazifesi olaraq taqdim ete. Fond bütün dünyada çeşit-türlü uquq qoruyıcı leyhalarnı kerçekleştire.
Rostov-na-Donu şeerindeki Cenübiy arbiy bölge mahkemesi ekinci Bağçasaray "Hizb ut-Tahrir davası" boyunca qarar çıqardı. Böylece, Merlen Asanovğa şiddetli koliniyada 19 yıl üküm etildi; Memet Belâlovğa şiddetli koliniyada 18 yıl ve 1,5 yıllıq sıñırlav üküm etildi; Timur İbragimovğa - şiddetli koliniyada 17 yıl ve 1,5 yıllıq sıñırlav üküm etildi; Server Zekiryayevge şiddetli koliniyada 13 yıl üküm etildi; Server Mustafayevge şiddetli koliniyada 14 yıl ve 1 yıllıq sıñırlav üküm etildi; Seyran Saliyevge - şiddetli koliniyada 16 yıl ve 1 yıllıq sıñırlav üküm etildi; Edem Smailovğa şiddetli koliniyada 13 yıl ve 1 yıllıq sıñırlav üküm etildi; Ernes ametov qabaatsız tanıldı ve mahkeme binasında azat etildi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
