Cinayetçiler Qırımda camilerni yaqmağa devam eteler

Andrey Kolokoltsev

Aqmescit – Qırımda camilerge yapılğan ücümlerniñ sayısı artıp başladı. İyün 13 künü saba belgisiz şahıs Aqmescit civarındaki Çuqırça qasabasında yerleşken camige yaqarlıq maddeler tolu şişeler attı. Qırım qoruyıcı organları mülkniñ mahsus yoq etilüvi maddesi boyunca cinaiy iş açtı. Din vekilleriniñ fikirince, bu vaqia milletlerara davanıñ açılması içün yapıldı.

«Çuqurça camisine» ücüm saba erte iyün 13 künü yapıldı, şu gece bütün musulman alemi muqaddes gecelerden biri Beraatnı («günâhlardan arınuv gecesi») keçirgen ediler. Nezaret etici kameralardan biri köstergenine köre, sat 4-ge yaqın beyaz urbada, başı örtüli, qara qolçaq ve çanta ile belgisiz yaş binağa taba bir qaç kere «Molotov kökteylini» attı.


Cami imamı Muhammed İslamovnıñ fikirince, bu şahıs yahşı azırlanğan edi. «Cinayetni yapqanı usullarına köre, yahşı azırlanğanını körmek mümkün. O qolaylıqnen «Molotov kökteyllerni» yaqıp, üç şişeni binağa atıp, közden ğayıp oldı», - dedi imam.

Fevqulade vaziyetler hızmetini çagırtmay, yanğınnı söndürip oldılar. Yanğın neticesinde, caminiñ plastik pencereleri zarar kördi. Binanıñ özü tiyilmey qaldı. Bundan da ğayrı, vandallar qor üstüne faşist timsalini sızıp qaldırdılar ve cinayet yapılğan tarihnı «13.06.2014» belgilediler.

Şimdiki vaqıtta vaqia boyunca taqiqat devam ete. Qırım.Aqiqat saytına Qırım «İİN» - niñ matbuat-hızmetinde şunı bildirdiler: «Bu vaqia qayd etildi. Caminiñ eki penceresi zararlandı. Etrafta yaşağan sakinlerni soravdan keçiremiz. Maddiy deliller qıdırıla».


Politsiyanıñ malümatına köre, yanğın vastasınen mülkniñ mahsus yoq etilüvi boyunca cinaiy iş açıldı.

Birinci ücüm degil

İmam Muhammed İslamov Qırım.Aqiqatqa aytqanı kibi, cami endi bir qaç kere cinayetçiler tarafıdan zarar kördi. 1998 senesi – pencerelerni qırdılar, 2004 senesi – divar ve minare üstünde ayıp sözler yazdılar. Bu seneniniñ mayıs ayında caminiñ üstünde olğan nezaret etici kameranı qırsladılar.

İmam qayd etkeni kibi, cinayetçilerniñ iç biri daa yaqalanmadı: «Men bu işni taqiqatnı lâqayd alıp barğan insanlarnıñ vicdanlarına qaldıram».

Muhammed oca, vaqia yerine kelgen politsiya hadimlerine, cinayetçilerni tapmaq işi ilk evelâ olar içün müim olğanını ayttı. Caminiñ zararlanğan pencerelerni ise, dindaşlarnıñ yardımınen tüzetmege niyet ete.

«Men bellesem, musulmanlar, Aqmescit sakinleri seslenirler – mesele bunda degil. Maddiy zarar çette qalsın, eñ qorqunçlısı qırımtatarlarğa, musulmanlarğa, umumen Qırım sakinleriniñ birligine yapılğan ziyandır, - dey imam. - Bu, milletlerara, dinlerara munasebetlerniñ kerginleşüvi, halqlar arasında davanıñ açılması içün yapıladır».


Yerli meclis reisi İbraim Zinedin tamam şu fikirde. O, bu cinayetni «milletlerara munasebetlerni bozması mümkün olğan provokatsiya» kibi adladı.

Qayd etmek kerek ki, soñki yılları Qırımda bu kbi vaqialar endi yüz bergen edi. 2013 senesi oktâbr ayında Qurban bayramı künyeri Saqta büyük camilerden biri yaqıldı. Eki künden soñ, Qurman rayonnıñ Rovnoye köyünde cami yaqıldı. İbadethaneniñ özü yanmadı, amma 8 Qurani-Kerim ateşte ğayıp oldı. Üç aydan soñra, qoruyıcı organlarnıñ vekilleri şeklengen şahısnı tapıp yaqaladılar. Bu Qurman rayonnıñ 35 yaşında yerli sakini edi, camini yaqqan künü saroş alda edi. Yapqan cinayetniñ sebeplerini öyle de añlatıp olamadı.