Mayısnıñ 24-nde Rusiye nezaretinde olğan Qırım Yuqarı mahkemesinde, yarımadada ğıyabiy şekilde mahkemelengen Refat Çubarovnıñ davası boyunca olıp keçken mahkeme oturuşında qabaatlav tarafı Çubarov içün 9 yıl apis ceasını istedi. O, Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv) binaen qabaatlana.
Bunı Rusiye ve Qırım haber vastaları bildire. Çubarovnıñ özü ve onıñ mudafaası Qırım prokurorınıñ talabını daa tefsir etmediler.
«Umumiy rejimli cezahanede doquz yıl apis cezası tayin etmeñizni isteyim. Ceza müddetini onıñ Rusiye Federatsiyası topraklarına ekstradatsiya etilgen anden saymaq», – «İnteraks» Rusiye agentligi devlet qabaatlayıcısınıñ aytqanlarından alınıtı ketire.
«Qırım esnasınıñ» haber etkenine köre, devlet qabaatlayıcısı mahkemede Çubarovnıñ qabaatı zarar körgenlerniñ, şaatlarnıñ ve dava boyunca diger delillerniñ tam olaraq isbatlanğan, dep bildirgen.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı
