Milliy Meclis reisi Refat Çubarov Azatlıq.Radiosına intervü berir eken, Ukrayina ordusınıñ Qırımnı işğalden azat etmek içün ilk küçlü darbelerni logistika obyektlerine ve Rusiye Qara deñiz flotunıñ obyektlerine endire bilecegini tahmin etti.
"Eñ küçlü zemaneviy raketalar ve diger silâ türleri ile ilk darbeler (buña Ukrayina arbiyleri qarar bersin)köpürge, gemilerge, Rusiye Qara deñiz flotunıñ diger obyektlerine endirilecek. Ve elbette, zapt etilgen yarımada ve Herson ve Zoporijjâ viletleriniñ işğal etilgen qısımlarından Rusiye topraqları arasında alâ mevcut olğan quru yol yoq etilecek", - dep ayttı Çubarov.
Onıñ sözlerine köre, "er kes Qırımnıñ azat etilmesi zaman meselesi olğanını pek yahşı añlay".
"İç kimse, telâşlanmañız, Qırım ebediyen "Rusiye toprağı" (evel aytqanları kibi, şimdi kettikçe daa az) kibi uydurmalarğa artıq inanmay", - dep qayd etti o.
Çubarov, Qırımda "pamuqlar" adlandırılğan adiselerge insanlar farqlı baqqanlarını dey.
"Rusiye işğalini qabul etmegenler ve etmemege devam etkenler, bular da yüz biñlernen qırımtatar, qavmiy ukrain ruhlandı. Olar yarımadanıñ azat etilmesini bekleyler", - dep bildirdi Meclis reisi.
"Partizan areketi faaliyet kösterip başladı. Bu, şimdilik daa er künlük faaliyet degil, amma er şey USQ Çonğarğa nasıl yaqınlaşacağına bağlı olacaq. Ve Qırımda olğan adamlarımız özüni kösterecek", - dep inana Çubarov.
Onıñ sözlerine köre, Qırımğa qanunsız şekilde yerleşken bir millionğa yaqın "müstemlekeci" şimdi "pek büyük bir telâş" içindedir.
"Paralarınıñ, resurslarınıñ bir qısmını yatırdılar, daireler ya da evler satın aldılar. Olar Qırımdan nasıl keteceklerini artıq tüşüneler. Bunı istemeyler, amma mecburlar. Ve elbette, işğalciler ile işbirlik etip başlağanlar, hainler - bu Ukrayina ordusınıñ Qırım toprağına ayaq basqanı arfesinde ilk nevbette qurtuluv qıdıracaq insanlardır", - dep bildirdi o.
Mayısnıñ 10-nda Azatlıq Radiosınıñ Qırım.Aqiqat leyhasınıñ jurnalistleri 2014 senesi Rusiye tarafından işğal etilgen Qırım yarımadasında 220-den ziyade Rusiye arbiy obyektini köstergen bir haritanı yayınladılar.
Daa evel Ukrayina Mudafaa nazirliginiñ Baş istihbarat idaresiniñ temsilcisi Andriy Yusov, Qırım sakinlerini "yaqın kelecekte arbiy obyektler ve tecavuzcınıñ ordusını temin etken obyektlerinden uzaq turmağa" çağırğan edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Qırım yarımadası, 2014 senesi qanunsız işğalden soñ Rusiye tarafından arbiyleştirildi. Ukrayina, Qırım ile beraber işğal etilgen bütün topraqlarını azat etecegini bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
