Qırımtatar Milliy Meclisiniñ reisi Refat Çubarov Rusiye reberliginiñ Qırımtatar Milliy Meclisiniñ binasınıñ devletleştirilmesini ve muzıka mektebine bermek qararını izaatladı.
"Bu binanen ne yapacaqlarını bilmeyler, şunıñ içün Aqmescitniñ 2-nci sanlı muzıka mektebine berdiler. Yarım yıl evelsi propaganda televizion kanallarınıñ yayınlarında anda evsiz adamlar yaşağanlarını körgen edim. Biz qaytqanda, birisiniñ mülküni, evini, toprağını zap etken anda quvulıcaq", - dep bildirdi Çubarov.
Mayısnıñ 24-nde Qırımnıñ Rusiye parlamentiniñ mebusları Ukrayina prezidentiniñ ömür arqadaşı Olena Zelenskanıñ Yaltadaki dairesiniñ ve Milliy Meclisniñ binasınıñ devletleştirilmesine qoltuttılar.
Vladimir Konstantinovnıñ sözlerine köre, Rusiye Federatsiyasına qarşı ğayrı dost areketler yapqan çetel vadandaşlarnıñ ve devletlerniñ devletleştirilmek kerek olğan mal-mülkü cedveline 57 madde qoşulğan.
Evel Qırımnıñ işğal yolbaşçısı Sergey Aksönov, Qırımda "ukrayinalı iş adamlarınıñ mülküniñ" satıluvından elde etilgen paranıñ Rusiyeniñ Ukrayinağa qarşı cenkini temin etmek içün qullanılacağını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
