2014 senesi dünya quvetleri Rusiye istilâsını toqtatmaq içün ciddiy çareler körmege azır degil edi, lâkin Rusiye Federatsiyasınıñ tam miqyaslı istilâsı Ğarpnıñ ayınıqlamasına yardım etti. Bunı Qırımtatar Milliy Meclisiniñ reisi Refat Çubarov Qırım.Aqiqatqa bergen intervyüsında bildirdi .
''2014 senesi fevral-mart aylarında ve soñraki 8 yıl devamında, dünya devletleri Rusiyeniñ istilâsını toqtatmaq içün ciddiy çareler körmege azır degil ediler. Bu, Vladimir Putinniñ qollarını boşattı, ve Ukrainağa qarşı cenk devamında yüzlernen şeer ve mesken yerler viran etildi, biñlernen yaşayış teminatı obyektleri, sanayı müessiseleri yoq etildi, millionlarnen qaçaq peyda oldı...'', - dep qayd etti o.
Çubarovnıñ aytqanına köre, Rusiye başlatqan büyük cenk dünya liderleriniñ Qırımnıñ tek Ukrayina içün degil, cenkten soñraki dünyanıñ istiqrarı içün müim olğanını añlamasına yardım etken.
''Ne yazıq ki, ukrayin şeerleri ve köyleriniñ büyük viraneleri, devam etken raketa ve bombalavlardan sebep, Rusiye ordusınıñ işğal etilgen ukrayin topraqlarında yapqan kütleviy öldürüvleri ve vahşetleri, dünya devletleriniñ siyasetçileri ve liderleriniñ aqlına kelmege yardım etti. 2022 senesi avgust ayında "Qırım platforması"nıñ ekinci sammitinde devlet başlarınıñ rekord sayısı iştirak etti, Ukrayina işğal etilgen bütün topraqlarnı, şu cümleden Qırımnı azat etkenine qadar, oña şartsız qoltutqanını bir ağızdan bildirdiler'', - dep qoştı o.
Bundan evel Çubarov Rusiye Federatsiyasınıñ prezidenti saylavları arfesinde qırımlılarğa muracaat etti. Onıñ qayd etkenine köre, Rusiye akimiyeti işğal etilgen topraqlarda yaşağan Ukrayina vatandaşlarını "qanunsız" ve "cinayet" saylavlarğa çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
