Qırımtatar Milliy Meclis reisi Refat Çubarov Rusiye prezidenti Vladimir Putinniñ noyabrniñ 4-nde Qırımğa kene kelecegini tefsir etip, halqara teşkilâtlarnı yarımadanıñ işğalini, "tamır halqnıñ basqılarğa oğrutalmasını ve taqibini" devam ettirgen Rusiye mevzusında curatsızlıq ile qabaatladı. Aynı zamanda, o, Putinniñ Aqyarda İttifaqdaş devlet şurasınıñ oturışını keçirmesini Ukraina ve dünya içün "yañı çağıruv" olaraq adlandırdı.
Onıñ fikrince, bir çoq zemaneviy siyasetçiler "olarnıñ Putinni sakinleştirme siyasetiniñ yalıñız Kremlniñ tecavuziy areketlerini rağbetlendirgenini pek yahşı añlaylar".
Çubarov, Aqyarda İttifaqdaş devlet şurasınıñ oturışını keçirmesi, "Kreml tarafından Belarus Cumhuriyetiniñ Qırımnıñ Rusiye statusını tanıması kibi telqin etilecegini" qayd etti.
"Putinniñ Rusiye tarafından işğal etilgen Qırımğa kelmesi ve Ukraina toprağında video konferentsiyası formatında "Yuqarı İttifaqdaş devlet şurası oturışınıñ" keçirlmesi halqara uquqnıñ qaba bozuluvı ve Ukraina ve dünya toplulığı içün daa bir çağıruvdır", - dedi o.
Kremlde bildirdiler ki, noyabrniñ 4-nde, Milliy birlik kününde Vladimir Putin Qırım yarımadasına iş ziyaretinen kelecek ve video konferentsiyası formatında keçirilecek "Yuqarı İttifaqdaş devlet şurası oturışın"da iştirak etecek.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
