Qırımtatar Milliy Meclis reisi Refat Çubarov Ukrayina ve RF arasında Kıyiv ve Moskvanıñ nevbetteki 15 yıl içün işğal etilgen Qırımğa dair noqta-i nazarı qayd etilecek añlaşmanıñ imzalanması aqqında teklifni takbih etti. Bunı o Facebook saifesinde yazdı.
"Putin ve diger rus aydutlarınen Qırımnıñ statusı ile bağlı 15 yıl devam etecek belli bir "aytışuv devri" ile razı olğan er keske deral rusiye arbiy gemisiniñ izinden ketmege teklif etile", - dep yazdı Çubarov.
Onıñ sözlerine köre, 2014 senesi Ukrayinanıñ "Rusiyeniñ bir qaç kün içinde işğal etken Qırımnı imaye etmege ne çaresi, ne küçü, ne siyasiy iradesi yoq edi".
"Buña köre, Ukrayina ordusınıñ iştiragi olmadan ne qırımtatarlar, ne qavmiy ukrayinler öz başına silâlı Rusiye ordusına tirenip olamaz edi. Amma bugün, Qırımnıñ RF tarafından işğaliniñ 8-nci yılında vaziyet bam-başqadır: Ukrayina Silâlı Quvetleri ve ukrayin siyasiy milleti Ukrayina toprağınıñ bir milimetrini bile bermege azır degil, şu cümleden Qırım ve Donbas da. Qırım ve Donbasqa hainlik etmemiz! Ukrayinağa hainlik etmemiz!", - dedi Çubarov.
Ukrayina delegatsiyası İstanbulda keçken Rusiye ile aytışuvlarda, Rusiyege yaqın 15 yıl devamında Kıyiv ve Moskvanıñ işğal etilgen Qırımğa dair noqta-i nazarını qayd etecek añlaşmanı teklif etti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
