Rusiye kontrolindeki Bağçasaray rayon mahkemesi «Çervona kalına» yırı yanğırağan toy saipleri ve musafirlerini memuriy mesüliyetke çekti. Rusiye mahkemesi mezkür yırnı «Ukrayına milletçileriniñ uruş türküsi» dep adlandırdı. Bu aqta mahkemeniñ matbuat hızmeti haber ete.
«Memuriy mesüliyetke çekilgen şahıslarğa 50 biñ rubleden para cezaları ve 5 künden 15 künge qadar idariy apis cezaları berildi», – dep bildirdi mahkeme.
Rusiye mahkemesi toy saipleri ve musafirlerini «mütehassısnıñ hulâsasına köre, Rusiye Federatsiyasında ekstremist tanılğan ve yasaqlanğan Ukrayına milletçileriniñ teşkilâtı tarafından qullanılğan timsali (uruş yırı) olğan ukrayın türküsini icra etkenlerinde» qabaatladı.
Bundan ğayrı, Rusiye qabaatlavı ve mahkemesiniñ versiyasına köre, bu toyda Ukrayınada Rusiye ordusınıñ areketleri «itibardan tüşürildi».
«Hususan «Çervona kalına» ukrayın yırı yanğıradı, sözleri böyle: «Moskva buğavlarından qardaş ukrayınalılarnı azat etmek», Rusiye Federatsiyasında faaliyeti yasaqlanğan Ukrayına milletçileri teşkilâtı tarafından qullanıla, Rusiye Federatsiyası silâlı quvetleri itibardan tüşürile», – dep bildirdi Rusiye mahkemesi.
Berilgen malümatqa köre, umumen 6 insan memuriy mesüliyetke çekildi. Olarnıña adları ve soyadları aydınlatılmay. Mahkeme saytında Ahtem Gemeciniñ Rusiye ordusını «itibardan tüşürüv» ve «nefret ya da duşmanlıq doğuruv» maddelerine istinaden mesüliyetke çeküv aqqında haber etile. Telegram kanalları Gemecini toy çalğıcısı dep adlandırdı.
«Krım 24» Rusiye devlet telekanalınıñ malümatına köre, eñ büyük ceza – 15 kün apis cezası – toy keçirilgen Bağçasaraydaki «Arpat» restoranınıñ saibi aldı. Toy çalğıcısı ve bir musafiri 10 künge apiske alındı, kiyevniñ anası 5 künge apiske alındı, kelinniñ anası ve «Arpat» saibiniñ ömür arqadaşı 50 biñ ruble para cezalarını aldı, çünki çağına yetmegen balaları bar.
Qırım.Aqiqat bildirgenine köre, Rusiye polisi Bağçasaray sakini Elvira Abdullayevağa qarşı eki protokol tizdi. O, Ukrayına yırları yanğırağan «Arpat» qavesinde keçirilgen toynıñ kiyev tarafı ola.
Bağçasaraynıñ Rusiye akimiyeti sentâbrniñ 10-nda Ukrayına yırları yanğırağan «Arpat» restoranını teşkere, dep bildirildi.
Bundan ğayrı, Rusiye Telegram kanalları Bağçasaraydaki toyda Ukrayına yırını qoyğan çalğıcı Ahtem Gemeciniñ açıq «afu» videosını derc etti.
Qırımlı Rusiye tarafdarı bloger Aleksandr Talipov Telegram kanalında, onıñ malümatına köre, sentâbrniñ 10-nda Bağçasaraydaki «Arpat» restoranında keçirilgen toynıñ videosını paylaştı. Videoda musafirler «Çervona kalına» ukrayın yırı yanğırağanda oynay. Talipov Aqmescitteki diger toynıñ da videosını paylaştı, anda «Eurovisionda» ğalebe qazanğan Kalush Orchestra taqımınıñ Stefania türküsi yanğıray.
Qırımda ukrayın yırlarınıñ icra etilüvi sebebinden ilk taqip degil. Bu yıl avgust ayında Qırımdaki Rusiye mahkemesi Şçelkino şeerindeki «Krab» qavesinde YARMAK ukrayın reperiniñ «Dıke pole» yırını qoyğanı içün dicey Yuriy Radionovğa 40 biñ ruble para cezasını ve 10 kün apis cezasını berdi. Onıñ aytqanına köre, ukrayın yırını qave musafirlerinden biri sımarladı, onıñ mündericesini bilmey edi. Daa soñra Rusiye mahkemesi «Dıke polenı» sımarlağan Dmitriy Gaynğa 50 biñ ruble para cezasını berdi.
Bundan evel kütleviy haber vastaları ukrayın yırı qoyulğanı içün dicey ve qave musafiriniñ «qabaatını tanuv» videosını derc etti. İçtimaiy ağlarda olğan videoda «Krab» qavesinje «Dıke pole» klipi kösterile. O, «Ukrayına Silâlı quvetleri yaşasın», dep yazıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
