Çehiya Cumhuriyetiniñ Tış işler nazirligi Qırım işğaline tirenüv künü munasebetinen içtimaiy ağdaki X saifesinde qırımlı aq qorçalayıcı ve cemaat jurnalisti İrına Danılovıçnıñ Rusiye apishanesinde tutuluv ikâyesini ve şaraitleri aqqında video yayınladı.
Video qırımlı siyasiy mabüslerge bağışlanğan rolikler seriyalardan biri edi. Mında Danılovıçnıñ ikâyesini Zmina insan aqları merkeziniñ idare yolbaşçısı Tetâna Peçonçik ikâye ete.
"Teessüf ki, bir çoq siyasiy mabüs alâ daa azatlıqnı bekley. Olarnıñ arasında jurnalist İrına Danılovıç de bar. Onıñ sesi eşitilmek kerek", — dep yazdı Çehiya Tış işler nazirliginiñ saifesinde.
Hatırlatamız, 2022 senesi qırımlı jurnalist ve aq qorçalayıcı İrına Daniıovıçnı FSB hadimleri alıp ketti. Daa soñra onı patlayıcı maddeler saqlağanında qabaatladılar, tahqiqat izolâtorında ise otit sebebinden uzun müddet tibbiy yardım kösterilmedi. Neticede faalniñ bir qulağı eşitmey, amma tedaviylenmey.
Keçken sene avgust ayında, koloniyada bulunğan soñ, Danılovıç qulaq ve baş ağrıları sebebinden tibbiy bölükke muracaat etti, amma ekim Lidiya Morozova, Danılovıç sağırlaşqan soñ, ağrı özü keçecek, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
