Çehiya Senatı Rusiye ordusınıñ Ukrayinadaki areketlerini genotsid kibi tanıdı, dep haber etti Ukrayinanıñ Çehiyadaki elçisi Yevgen Perebiynis.
Öz yazısında o, Çehiya parlamentiniñ yuqarı palatasınıñ qararını yayınladı. Onıñ sözlerine köre, bu qararda, Kıyivniñ silâ teslimatı meselelerinde ilerideki destegi ve Ukrayinanıñ AB azalığına namzet statusı alması aqqında söz kete.
Evel Kanada, Letoniya, Estoniya ve Litvaniya parlamentleri de Rusiyeniñ Ukrayinadaki areketlerini genotsid kibi tanıdı. Bundan ğayrı Litvaniya parlamenti Rusiyeni "terrorcılıqnı paranen temin etken devlet" adlandırdı.
Aprelniñ ortasında ABD prezidenti Joseph Biden Rusiye prezidenti Vladimir Putinniñ Ukrayinağa qarşı siyasetini genotsid adlandırdı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
