Oturışta Ukrayinanıñ Çehiyadaki elçisi Vasıl Zvarıç, Ukrayina halq deputatları Mariya Mezentseva ve Mkola Knâjıtskıy, em de qırımtatar halqınıñ liderleri, hususan Mustafa Cemilev iştirak etti, o, çeh akimiyetine minnetdarlığını bildirdi.
"Şimdi Ukrayinağa yardım etkeniñiz içün büyük teşekkür bildirmege isteyim, qıyın vaqıtta silâ ile yardım etip, yüz biñlernen qaçaqnı sığındırğanıñız içün. 1944 senesi qırımtatarlarnıñ genotsidini tanımaq, şimdi Ukrayinağa pek kerek olğan destekniñ büyük ifadesidir. Ümüt etem ki, Çehiya bu demokratik qıymetlerge köre yaşamağa devam etecek", — dep ayttı Cemilev Çehiya parlamentiniñ sanasından.
Genotsidni tanımaq teşebbüsçisi, mudafaa ve halqara işler komitetiniñ reisi, çeh senatorı Pavel Fişer Azatlıq Radiosına bu tarihiy qarar olğanını ve Çehiya Cumhuriyetiniñ Ukrayinağa qol tutuvınıñ mantıqlı devamı olğanını ayttı.
"Rusiye halqara qanunlarğa baqmadan Qırımnı işğal etken 2014 senesinden berli Ukrayinağa közetemiz ve yardım etemiz. Şunıñ içün bu bizim içün printsipial bir mesele edi. Bugün Mustafa Cemilevni diñledik ve aman-aman bütün senat bu müim qararnı qabul etti", — dep Pavel Fişer Azatlıq Radiosınıñ jurnalistlerine.
Noyabrniñ soñunda Çehiyada Senatnıñ tış işler, mudafaa ve havfsızlıq komiteti 1944 senesiniñ sürgünligini qırımtatar halqınıñ genotsidi olaraq tanığan rezolütsiya leyhasını tasdıqladı.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Oktâbrniñ 9-nda Ukrayina Yuqarı Radası çetel devletlerniñ ükümetleri ve parlamentlerini 1944 senesi qırımtatarlarnıñ Qırımdan sürgün etilmesini qırımtatar halqınıñ genotsidi olaraq tanımağa çağırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
