Çehiya Rusiye nefti ve gazına 7 milliard yevrodan ziyade masraf etti. Bu, Ukrayinağa arbiy yardım olaraq bergen 1,29 mlrd yevro miqdarından beş qat ziyadedir. Bunı Bulğaristanda yerleşken Demokratiya ögrenüv merkezi bildire.
Rusiyeniñ Ukrayinağa tam miqyaslı istilâsı başlağan soñ, deñizge çıqışı olmağan Çehiya, Macaristan ve Slovakiya Rusiye neftine qarşı Avropa embargosından tış qaldılar. Bu olarğa yañı yollarnı açmağa imkân berecek edi, lâkin Çehiyada bu boşluq memleketniñ yekâne cermay işleyicisine, Poloniyanıñ Orlen Unipetrol şirketine, rusiyeli energiya taşıyıcılarından 1,2 milliard yevro miqdarında para qazanmağa imkân berdi.
Bunıñ sebebi, 2023 senesi Rusiye nefti Azerbaycandan kelgen yanacaqqa köre ortalama 21% paalı edi. Neft satuvı neticesinde Rusiye büdjeti er ay 50 million yevro ala.
2023 senesi Çehiyanıñ Rusiye neftine bağlılığı 60%-ğa arttı, 2024 senesi ise 50%-ğa qadar eksildi. Demokratiyanı ögrenüv merkeziniñ talilcileri dey ki, Çehiya, Transalpiysk neft borusınıñ yedek küçü, Almaniyadan neft mahsulatınıñ ihracatınıñ arttırılması ve memlekette olğan bayağı neft yedekleriniñ qullanıluvı sayesinde Rusiye neftini bütünley deñiştire bile. Çehiya Cumhuriyetiniñ sanayı nazirligi bu iş üzerinde çalışqanını bildire, lâkin "ükümetniñ şahsiy biznes qararları üzerinde doğrudan-doğru nezareti yoq", dep ayta Orlen. Orlen ise bütün qanunlarğa riayet etkenini ve Rusiyege ait olmağan neftke tam olaraq keçmege azırlanğanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
