Ukraina ve Rusiye arasında munaqaşa yalıñız rus ordusınıñ Ukraina topraqlarından tam şekilde çıqarılmasından soñ bitecek. Bunı Ukraina TİN yolbaşçısı Dmıtro Kuleba brifing vaqtında bildirdi.
"Bu çatışma, soñki rus askeri Donetsk ve Lugansk vilâyetleriniñ ayrı bölgelerini, işğal etilgen Qırım ve Aqyar şeerini terk etken soñ bitecek", - dedi Kuleba.
Öz nevbetinde ABD devlet kâtibi Entoni Blinken bildirdi ki, onıñ Kyivge ziyareti "Ukraina suvereniteti ve topraq bütünligine deñişmez destek demektir.
"Qayd ettim ki, Ukraina aqqında Ukrainasız iç bir şey. Ukrainanıñ vaziyetniñ tınç çezilmesi tarafdarı olğanını alğışlayım ve Rusiyeni diplomatiyanı ögge doğru yekâne mümkün yol kibi saymağa çağıram", - dedi Blinken.
Yanvarnıñ 19-nda Entoni Blinken Ukrainağa kelip çıqtı. Yanvarnıñ 20-nde devlet kâtibi Berlinge ketecek, yanvarnıñ 21-nde Rusiye TİN başı Sergey Lavrov ile Jenevada körüşecek.
Küzde kütleviy haber vastaları istihbaratnıñ malümatına esaslanıp, Ukraina sıñırında Rusiye ordusı toplana, dep bildirdi. ABD ve Ğarp memleketleri Moskva silâlı ücüm azırlay, dep tahmin etti. Kreml bu laflarnı inkâr etip, ABD ve NATOdan telükesizlik kefaletlerini talap etti – hususan, NATOnı şarqqa kenişletmemek ve eski sovet cumhuriyetlerini arbiy ittifaqnıñ yañı azaları sırasına almamaq.
