Herson vilâyetiniñ Çaplınka qasabasında Rusiye arbiyleri Rusiyeniñ Ukrainağa ücüm etüvine qarşı miting vaqtında ateş açtı. Bu aqta Ukraina İç işler naziriniñ mesleatçısı Anton Ğeraşçenko bildirip, çatışma videosını Telegram kanalında derc etti.
Videoda Ukraina bayrağını tutqan insanlar bar, silâlı Rusiye arbiyleri olarğa ücüm ete.
«Apostrof TV» YouTubeda Çaplınkadaki narazılıqlar videosını derc ete. Miting iştirakçileri Rusiye arbiylerine «Evge!» dep qıçırdı. Askerlerniñ arqasında Z işaretli yük maşinaları tura.
Çaplınka sakini Aleksandr Posunko Facebookta bildirgenine köre, Ukrainağa qoltutuv mitinginde tahminen 3 biñ çaplınkalı ve rayon sakini iştirak etti. Onıñ malümatına köre, çatışma neticesinde eki insan yaralandı. Bu malümatnı resmiy şekilde tasdıqlamadılar.
Ukrainada Rusiye ücüm etken soñ arbiy vaziyet ilân etildi (2022 senesi fevralniñ 24-ü saba saat 5:00-dan başlap 30 künge). Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete ve «Ukrainanı askeriysizleştirüv ve denatsifikatsiya» ola, dep bildire.
Ukraina Silâlı quvetleri Baş ştabınıñ malümatına köre, martnıñ 7-nde saba Ukrainada 11 biñden çoq Rusiye arbiyi elâk oldı. Rusiye Mudafaa nazirligi Ukrainada aman-aman 500 arbiyi elâk olğanını resmiy şekilde tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
