"Şunıñ içün men Qırım sakinlerine muracaat etmek isteyim: diqqatlı oluñız, anda ayat normal olmağanını añlañız. Ve kelecekke azırlanmaq kerekmiz. Çantalarnı, yedeklerni, arbiy ameliyatta yardım etecek er angi kerekli şeylerni azırlañız. Olsa da, olmasa da oña azır oluñız. Büyük ihtimalnen, o olacaq. Öz-özüñizni aldatmañız, er şey yahşı olğanını aytqan bu propagandağa qulaq asmañız. Bu yahşı degil! Azırlanıp, ne olacağını bekleñiz. Em de, faal areket etmek istegenler de azırlansınlar. Bu da kerek olacaq", — dep ayttı Celâl.
Onıñ fikrince, Qırım çeşit yollarnen, şu cümleden arbiy yollarnen de, azat etilecek. "Ve azır olmaq kerek. Ve qurbanlar olacağını añlamaq kerek. Bu arbiy operatsiya başlağanda nasıl areket etecegimizni belgilemek kerekmiz", — dep qoştı Meclis reisiniñ birinci muavini.
Celâlnıñ fikrince, işğalden azat etilgen soñ Ukrayina içün eñ büyük çağıruv Qırım sakinleriniñ "ukrayin zihniy alanına" qaytması olacaqtır.
"Qırım sakinleriniñ çoqusı qaytmaq istey. Bunı istegenler de bar. Bazıları Ukrayina devletinden Qırım Ukrayina nezareti altına qaytqan soñ ne yapılacağı aqqında açıq cevap almaq istey. Bu er şeyni aytmaq kerek, añlatmaq kerek, insanlar buña azır olsunlar. Amma esas beyanat şudır ki, biz memnünmiz ve siziñ qaytqanıñıznı isteymiz, biz sizge yardım etecekmiz. Ukrayina bunı aytmalı", — dep qayd etti o.
İyün 28-de Rusiye esirliginden on Ukrayina vatandaşı qaytarıldı, olarnıñ arasında Qırımtatar Milliy Meclisi reisiniñ birinci muavini Nariman Celâl bar. Bugünde-bugün ukrain siyasiy mabüsleriniñ sayısı 217 adamnı teşkil ete, olarnıñ 60% - qırımtatarıdır, dep bildirdi Ukrayina prezidentiniñ QMC-deki vekâletli temsilcisi Tamila Taşeva.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
