Ukrayina baş naziri Denis Şmığal, Çernobıl atom stantsiyasınıñ bozulğan 4-ünci blokunıñ sığınaqına yapılğan rusiye dronınıñ ücümini "terroristik akt" olaraq adlandırdı.
Ukrayina ükümetiniñ yolbaşçısınıñ fikrine köre, ücüm daa bir kere "Kremlniñ sertligini ve insan ayatına lâqaytlığını" köstere.
"Radiatsion telükeden qorçalağan sığınaqqa ücüm etüv bütün dünya içün bir çağıruvdır. Duşman tek küçni añlay. Şunıñ içün ortaqlarımıznı Rusiyege, hususan onıñ özek sanayısına qarşı ciddiy sanktsiyalar tayin etmelerine çağıramız. İstilâcını mümkün olğanı qadar zayıflatmaq kerek", — dep yazdı Şmığal öz telegram kanalında.
Bundan evel Fevqulâde vaziyetler boyunca devlet hızmeti bildirdi ki, Çernobıl elektrik stantsiyasınıñ dörtünci blokunıñ sığınağına Rusiye uçağı tüşken soñ radiatsion telüke normal olıp qala:
"ÇAES sanayı meydançığında 0,57 mqZv/saat qayd etildi, bu ise qabul etilgen qıymetlerden ziyade degil. Nezaret devam ete. Vaziyet nezaret astındadır".
Fevralniñ 14-ne keçken gecesi Rusiyeniñ ücüm uçağı Çornobıl atom stantsiyasınıñ 4-nci energetik blokunıñ sığınağına tüşti, dep bildirdi Ukrayina prezidenti Volodımır Zelenskıy.
Halqara atom energiyası agentligi Çornobıl AES-nda gece patlav yüz bergenini tasdıqladı. Mında şunı da qayd ettiler ki, AES sarkofagınıñ damına dron uruldı, amma bu Rusiye dronu olğanını aytmadılar.
Ukrayina Silâlı quvetleriniñ Ava quvetleriniñ malümatına köre, Rusiye ordusı Ukrayinağa kiçik aynıñ 14-ne keçken gecesi 133 "Şahed" tipli uçaqsız uçaq ve imitatorlarnen ücüm etti. 73 dronnıñ urıp tüşürilüvi tasdıqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
