Rusiye TİN matbuat kâtibi Mariya Zaharova iyünnniñ 21-nde Avropa Birliginiñ «Qırım sanktsiyalarını» daa bir yılğa uzatmasına cevap berdi.
«Avropa Birligi Qırım ve Aqyarğa qarşı sanktsiyalarnı bir yılğa uzattı. Cevap ne olacağını bileler. Qırım Anayasağa binaen Rusiye Federatsiyasınıñ qısmı olğanını bileler. Qararnıñ, neticeleriniñ AB tarafından lâqayd qala bilecegini yaşayış tarafından tasdıqlanğan Qırım referendumı vaqtında alınğanını bileler. Bileler, amma kene sevimli hatasını yapalar», – dep yazdı Zaharova içtimaiy ağlardaki saifesinde.
Avropa Birligi Qırımnıñ Rusiye tarafından işğal etilmesi sebebinden qoyulğan sanktsiyalarnı daa bir yılğa uzattı. Sanktsiyalar Qırımdan ital etüvge, Qırımdaki astyapı ve maliye yatırımlarğa ve turizmge qarşı qoyulğan.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
