«Ukrayına konsullıq hızmeti qanun leyhası qabul etilgen soñ talaplarına uyğun olacaq şekilde qanun altı aktlarınen belgilene. Bundan ğayrı, bu sebepler konsullıq işleriniñ yapılması içün qullanılğan Tış işler nazirliginiñ informatsion-kommunikatsion sistemasınıñ iş algoritmine tehnik deñişmelerni kirsetmege mecbur etti», – dep aytıla aprelniñ 23-nde aydınlatılğan haberde.
Tış işler nazirligi qayd etkenine köre, erkeklerge konsullıq hızmetleriniñ kösterilüvini toqtatmaq qararı vaqtınca bir adım ola, «çünki çetelde bulunğan askerlikke uyğun yaşta vatandaşlarnıñ arbiy cedvelge aluv meselelerini çezmek kerek».
Ne vaqıt hızmet tekrar kösterilecek sualine Tış işler nazirligi seferberlik qanunı 2024 senesi mayısnıñ 18-nde işke tüşürilgen soñ «konsullıq işlerinen bağlı arizalar qanun talaplarına uyğun şekilde kene qabul etilecek ve baqılacaq».
Ukrayına Tış işler naziri Dmıtro Kuleba çetelde askerlik yaşına uyğun erkeklerge konsullıq hızmetleri kösterilmegenini tasdıqladı.
Nazir qayd etkenine köre, yañı qanun qabul etilmezden evel de insanlar territorial tekmillev merkezlerinde vesiqalarını yañartmaq kerek edi.
«Çetelde bulunmaları vatandaşlarnı Vatan ögündeki mecburiyetlerinden serbest etmey. Şunıñ içün tünevin Ukrayınada ve çetelde seferberlik yaşına kelişken erkeklerge nisbeten adaletli yanaşuv tedbirlerini almağa emir berdim. Doğrusı bu», – dep qoştı diplomat.
Çeh Cumhuriyetindeki Gromada ukrayın tilli neşiri Pragada ukrayınalılar içün pasport hızmeti azır vesiqalarnı bermey, dep haber etti. «Suspilne» diplomatik hadimniñ malümatına esaslanıp, askerlikke alına bilgen yaşta vatandaşlar vaqtınca qabul etilmey, dep bildirdi.
Yuqarı Rada aprelniñ 11-nde seferberlik, arbiy cedvelge aluv ve askerlik meselelerini mükemmelleştirüv qanunını qabul etti.
Vesiqağa köre, 18-60 yaşlarında erkekler 60 kün içinde arbiy komissarlıqta, memuriy hızmetler merkezinde ya da elektron odada malümatını yañartmağa mecbur. Arbiy vaziyet vaqtında erkeklerniñ arbiy vesiqaları er vaqıt yanında olmalı ve polis ya da territorial tekmillev merkeziniñ hadimleri talap etse olarnı köstermege mecburlar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
