Link açıqlığı

Saatnıñ esas haberi

«Cesür, küleryüzlü». Advokat, «Qırım birdemliginiñ» koordinatorı Mustafayevni SİZOda ziyaret etti


Server Mustafayevniñ ana-babası Venera ve Rustem advokat Sergey Legostovnen Akmescit SİZOsınıñ binası ögünde
Server Mustafayevniñ ana-babası Venera ve Rustem advokat Sergey Legostovnen Akmescit SİZOsınıñ binası ögünde

Advokat Sergey Legostov «Qırım birdemliginiñ» koordinatorı, Bağçasaraydaki ekinci «Hizb ut-Tahrir davasınıñ» mabüsi Server Mustafayevni tahqiqat izolâtorında ziyaret etti, dep bildirdi Qırım.Aqiqat mühbiri.

Legostovnıñ aytqanına köre, faal – «cesür, küleryüzlü». Körüşüvde olar kelecek mahkemede olacaq imayeni muzakere ettiler.

«Davanen bağlı mevamnı laf ettik. Mahkeme qararlarında şablonlarnıñ müddeti ve qullanılmasını muzakere ettik. İmaye oturışuvda ev apsi aqqında ayta, qadı ise qararda «çıquv yasağı» ya da tahqiqat delilleri davamızda olmağan sorğu protokollarınen isbatlana, dep yaza. Bu mahkeme tahqiqatınıñ keyfiyetini ve mahkeme vesiqalarınıñ azırlığını köstere», – dep añlattı Legostov.

Keçken sene dekabr ayında Server Mustafayev psihiatrik hastahanege yatqızıldı, dep bildirilgen edi. Mustafayev bunı «cezalandırıcı psihiatriya» dep adlandırdı.

Ukraina jurnalistleri milliy birligi Server Mustafayevniñ taqip etilüvini fikir serbestligi, malümatnı serbest aluv ve tarqatuvnıñ, şu cümleden internette, bozuluvı olaraq tanıy.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

Dekabr ayında Aqmescitniñ Rusiye mahkemesi Mustafayev ve Smailovnıñ apis müddetini eki ayğa uzattı. Olar 2019 senesi fevralniñ 9-na qadar SİZOda qalacaqlar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG