Rusiye ordusı oktâbrniñ 19-na keçer gecesi Çerkası vilâyetine ücüm etti, dep bildirdi vilâyetniñ arbiy memuriyet reisi İgor Taburets.
«İlk malümatqa köre, umumen ava mudafaa ve radioelektron küreş küçlerinen duşmannıñ 41 uçucısızı ve 2 raketası yoq etildi. Lâkin bir qaç yerge urğanlar, parça tüşkeninden de aqibetler bar», – dep tarif etti o.
Çerkası vilâyetiniñ arbiy memuriyet yolbaşçısınıñ aytqanına köre, «Uman rayonına qarşı darbe neticesinde 1961 doğma qadın yaralarından can berdi».
«Tibbiy müessisege onı pek ağır alda alıp ketkenler. Ne yazıq ki, ekimler bir şey yapıp olamadı», – dep tarif etti Taburets.
Bundan ğayrı, vilâyetniñ arbiy memuriyet yolbaşçısınıñ malümatına köre, Çerkası vilâyetinde kritik infrastruktura obyekti ücümge oğradı.
«Neticelerini soraymız. Bundan ğayrı, Şahed şahsiy müessiseniñ anbarına tüşti. Yanğın endi söndürildi. Bir kişi yaralandı. Hastahanege barmağa istemedi», – dep qoştı vilâyetniñ arbiy memuriyet yolbaşçısı.
Taburets «şahsiy sektorda uçucısız parçaları mesken ev ve bir bina pencerelerine zarar ketirdi», dep ayta.
Rusiye küçleri daima çeşit türlü silâ qullana – ücüm uçucısız, raketa, tüzetilgen ava bombaları, toplu ateş reaktiv sisteması – Ukrayina regionlarına ücüm eteler.
Rusiye reberligi Rusiye ordusı Ukrayina şeer ve köyleriniñ vatandaş infrastrukturasına maqsatlı ücümler yapqanını, sakinlerni öldürgenini ve hastahane, mektep, bala bağçaları, energetika ve suv teminatı obyektlerini yıqqanını inkâr ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
