Qırımtatar aq qorçalayıcısı Abdureşit Cepparovğa Rusiye polisiniñ hadimleri qanun bozulmaycağına dair tenbi oqudı. Bu aqta "Tribunal.Krımskiy epizod" aq qorçalayıcı leyhası vaziyetten haberdar olğan qırımlı faallerden biriniñ malümatına esaslanıp haber ete.
Qayd etilgenine köre, ziyaret ve tenbi sebebi onıñ daa evel Rusiye Federatsiyası Memuriy uquq bozuvları kodeksiniñ "ekstremizm" maddelerine istinaden memuriy mesüliyetke çekilgeni ve yaqınlaşqan 1944 senesi qırımtatar sürgünliginiñ qurbanlarını añma künü oldı.
"Halqara gumanitar uquq işğalci akimiyetniñ zapt etilgen topraqlarnıñ sakinlerinen "profilaktik" iş yapqanında bir bozuv körmey. Lâkin uquq qoruyıcılarnıñ ziyareti ve memuriy ve cinaiy kodeks maddelerinen tenbi oqumalarında ealini qorquzuv alâmetleri bar. Qırımlılarğa qarşı böyle areketlerge Halqara mahkeme qıymet kesecektir", – dep qayd etile leyhada.
Uquq bozuvı tenbisi – qanun bozuluvı olaraq tanılması mümkün olğan er angi areketniñ yapılmaycağına dair resmiy haber.