Ukrayına Qırım yerustü arbiy operatsiyalar vastasınen azat etilecegine azır, amma diplomatik yol da ola bile. Bu aqta Ukrayına Tış işler naziriniñ birinci muavini Emine Ceppar Azatlıq Radiosına ayttı.
«Mence, bu stsenariy, diplomatiya kibi, inkâr etilmemeli. Eki yolğa azır olmaq kerekmiz... Meselâ, Hırvatistannıñ bir qaç on yıl evelsi olğan arbiy tarihında topraqlarınıñ üçte ekisini arbiy yolnen, üçte birini diplomatiya vastasınen keri aldı. Yani biz de bir yolnen sıñırlanmamalımız», – dedi Ceppar.
2023 senesi iyül ayında Ukrayına prezidenti Volodımır Zelenskıy Ukrayınanıñ ğayretleri cenüp ve şarqta topraqlarnı keri almaqnen bağlı olsa da, «devletniñ maqsadı Qırımnıñ azat etilüvi ola», dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
