Ukraina Tış işler naziriniñ birinci muavini Emine Ceppar iyülniñ 7-nde saba işğal altındaki Qırımda Rusiye quvetçileri keçirgen tintüvlerni izaatladı. Onıñ tahminlerine köre, tintüvlerden soñ tutulğan qırımtatarlar Rusiyeniñ terrorizm maddesine istinaden qabaatlanacaq.
«Altı kişi tutuldı. Olarnı Rusiye Federatsiyası Ceza kodeksiniñ belli 205.5 maddesi bekleydir. Şimdi olar Aqmescitteki FSB bölüginde tutula. Yañı tutulğanlarnen endi 67 qırımtatarı RF Ceza kodeksiniñ 205.5 maddesine köre tutuldı. Olarnı terrorist dep köstermege tırışalar», – dep yazdı Ceppar Facebookta.
Qırımnıñ bir qaç rayonında iyülniñ 7-nde Rusiye quvetçileri qırımtatarlarnıñ evlerini tintti. Altı kişi Aqmescitteki FSB idaresine alıp ketirildi.
Tutulğanlardan biriniñ ömür arqadaşı qayd etkenine köre, olarnı Rusiye Ceza kodeksiniñ 205.5 maddesiniñ 1-inci qısmına (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv – QA) istinaden qabaatlaylar.
Qırımnıñ Rusiye quvet müessiseleri vaziyetni izaatlamay.
