Ukraina Tış işler naziriniñ birinci muavini Emine Cepparnıñ bildirgenine köre, qırımtatar milliy lideri Mustafa Cemilevniñ ömür arqadaşı Safinar Türkiyedeki hastahanelerden birinde tedaviylenmege devam ete.
«Bir qaç aftadan berli Ankara hastahanesinde tedaviylengen Safinar Cemilevanı yoqlağanıma quvandım. Qırım aqqında laf ettik, fikirlerini ve hatırlavlarımıznı paylaştıq. Er keske selâm aytıp, daa yahşı olğanını aytmamnı rica etti. Sağlığı içün kritik bir şey ya da telüke yoq. Planlaştırılğan ve keyfiyetli bir tedaviylev», – dep bildirdi Ceppar Facebookta.
Sentâbrniñ 26-nda Qırımtatar Milliy Meclisiniñ reisi Refat Çubarovnıñ bildirgenine köre, Safinar Cemileva «yaramayıp», Türkiyedeki hastahanelerden birine acele tahliye etildi. Sağlığınıñ ne sebepten fenalaşqanı belli degil.
Safinar Cemileva Qırımtatar qadın-qızlar birliginiñ reisi ola. 2015 senesi dekabrniñ 26-nda ofisi Gasprinskiy Qırımtatar cumhuriyet kütüphanesinde olğan cemaat teşkilâtını kütüphane reberligi binadan quvıp başladı. Başta ofiste elektrikler ve qızdıruv kesildi, soñra binanı boşatmağa talap etip başladılar. Safinar Cemileva 2016 senesi sentâbrniñ 18-nde Qırımda teşkil etilgen Rusiye Devlet dumasınıñ saylavlarını boykot etti.
2017 senesi Cemilev Safinar Cemileva Rusiye pasportını almağanı içün Rusiye işğali altındaki Qırımdan sürgün etile bile, dep bildirgen edi.
