Ukraina TİN birinci muavini Emine Ceppar Sloveniya TİN-niñ devlet kâtibi Stanislav Raşçan ile "Qırım platforması" faaliyetiniñ prioritetlerini muzakere etti.
Körüşüv vaqtında işğal etilgen Qırımdaki vaziyetni, hususan "çoq sayılı insan aqlarınıñ bozulması köntekstinde" muzakere ettik, dep yazdı Ceppar Facebook saifesinde.
"sentâbrniñ 3 ve 4-nde Qırımtatar Milliy Meclisniñ reis muavini Nariman Celâl, Asan ve Aziz Ahtemov qardaşları ile beraber uydurılğan qabaatlardan tevqif etilmesini qayd ettim. Bu ise yarımadada qırımtatarlarnıñ taqip etilmesiniñ soñki adden aşır adiselerden biridir. Aynı zamanda bu Qırım platformasınada iştirak içün Meclis yolbaşçılarına qarşı cezalandırıcı davadır", - dedi Ceppar.
Onıñ sözlerine köre, ayrıca "Qırım platforması"nıñ faalintiniñ kelecek prioritetleri, hususan Kyivde fevralnıñ 25-26-nda Qara deñiz telükesizlik konferentsiyasınıñ keçirilmyesine azırlıq aqqında aytqan.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
