Ukraina Tış işler naziriniñ birinci muavini Emine Ceppar Avropa parlamentiniñ deputatlarına Qırımnı işğalden qurtaruv platformasını taqdim etip, olarnı da bu teşebbüste iştirak etmelerine davet etti.
Ukraina nazirliginiñ bildirgenine köre, online tedbirde Poloniya Avropa parlamentiniñ deputatı, «Avropa konservatorları ve islâatçıları» firqasınıñ baş kâtibi Anna Fotıga ve Litva Cumhuriyetinden Avropa parlamentiniñ deputatı Petras Avstreviçus iştirak etkenler.
«Qırımnı işğalden qurtaruv ve işğal aqibetlerini çezüv ğayretini faalleştirmek kerek olğanını qayd etken nazirniñ birinci muavini tedbir iştirakçilerine Ukrainanıñ yañı teşebbüsini – Qırım platformasını – taqdim etti ve Avropa deputatlarını onıñ parlament işinde qoşulmalarına davet etti. Tedbirniñ müim qısmı Ukraina halq deputatları Rustem Umerov, Liza Yasko ve Vadim Galayçuk tarafından Ukraina Yuqarı Radasındaki yañı «Qırım platforması» fraktsiyasınıñ taqdim etilüvi oldı», – dep aytıla haberde.
Dekabrniñ başında AB tış siyaset hızmetiniñ resmiy vekili Peter Stano, Brüssel, Ukrainanıñ «Qırım platformasını» quruv teklifini ve Avropa Birliginiñ Qırım vekili vazifesini baqa, anda bu platformanıñ qurulışı aqqında ilâve malümat bekleyler, dep ayttı.
Ukraina akimiyeti AB ve Ğarp memleketlerini yarımadanı qurtaruv boyunca «Qırım platformasına» qoşulmalarına faal sürette davet ete. Tış işler naziri Dmıtro Kuleba Qırımnı işğalden qurtaruv sammitini Kyivde 2021 senesi mayısta keçirmege planlaştıralar, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
