Ukraina Tış işler naziriniñ birinci muavini Emine Ceppar iyülniñ 1-nde Yaponiyanıñ Ukraina elçisi Kura Takaşi ile körüşip, Qırımnı işğalden qurtaruv meselesiniñ yüksek siyasiy seviyede daa faal muzakere etilüvini yañıdan başlatmağa niyetlene, dep bildirdi.
Bu aqta Ukraina Tış işler nazirliginiñ matbuat hızmeti bildire.
«Ceppar, Rusiye tarafından Ukraina topraqlarınıñ işğal etilüvini qabul etmeme çerçivesinde işğal altındaki Qırım meselesiniñ halqara seviyede muzakere etilmesini faalleştirmege niyetlene, dep bildirdi», – dep aytıla haberde.
Qayd etilgenine köre, Yaponiya elçisi ve Ukraina Tış işler naziriniñ birinci muavini vaqtınca işğal etilgen Qırımdaki vaziyetni, onıñ Rusiye tarafından askeriyleştirilüvini ve yarımadada Ukraina vatandaşlarınıñ aqları ve serbestlikleriniñ bozuluvını muzakere ettiler.
«Nazirniñ birinci muavini qayd etti ki, vaqtınca işğal etilgen Qırım Muhtar Cumhuriyeti ve Aqyarda Rusiye Anayasasınıñ tüzetüvlerine «rey berüv» neticeleri uquq ceetinden boş ola ve Ukraina tarafından tanılmaycaqtır», – dep qayd etti müessise.
Ceppar, Yaponiyağa Ukraina suvereniteti ve topraq bütünligine qol tutqanı ve Rusiyege qarşı Yaponiya sanktsiyalarını uzatqanı içün teşekkürler bildirdi.
Ukraina Tış işler naziri Dmıtro Kuleba da Qırım.Aqiqatqa intervyü berip, Rusiye Anayasasında olacaq iç bir deñişme Qırımnıñ işğalden qurtarılmasına keder etmeycek, dep eminliknen bildirdi.
Rusiyede ve işğali altındaki Qırımda Rusiye Anayasasınıñ tüzetüvlerinen bağlı rey berüv keçirildi. Tüzetüvlerden biri prezident yıllarını «sıfırlap», Rusiye prezidenti Vladimir Putinge daa eki saylavda namzetini köstermege ve 2036 senesine qadar akimiyette qalmağa imkân berecektir.
Ukraina Tış işler nazirligi, işğal altındaki Qırımda Rusiye Anayasasınıñ tüzetüvlerine rey berüv qanunsız ola, dep qayd etti.
Kuleba iyünniñ 2-nde Berlinni ziyaret etip, Kyiv «Qırımmnıñ işğalden qurtarılması qaçınılmaz olğanına dair» halqara muzakere platformasını halqara ortaqlarınen laf ete, dep bildirdi.
Onıñ qayd etkenine köre, Ukraina Tış işler nazirligi Qırımnı işğalden qurtaruv strategiyasını azırlay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
