Ukraina Tış işler naziriniñ birinci muavini Emine Ceppar Ukrainanıñ ABD işleriniñ vaqtınca temsilcisi Kristina Kvin ile Rusiye işğal etken Qırım ve Donbas rayonlarını işğalden qurtarmaq içün halqara ğayretlerniñ quvetleştirilüvini muzakere etti. Bu aqta Ukraina Tış işler nazirliginiñ matbuat hızmeti bildirdi.
«Ceppar Qara ve Aq deñizleri regionında telükesizlik, insan aqlarınıñ qorçalanmasını pekitmek, informatsion saada işbirligini kenişletmek, Ukrainada ABD halqara inkişafı agentligi programmalarınıñ kerçekleştirilüvi müim olğanını qayd etti. Kristina Kvin ABD Memuriyeti ve Kongressiniñ Ukraina sıñırları deñişmegenine ve devletimizniñ demokratik inkişafına qol tutqanını tasdıqladı. Taraflar USAID vastasınen, hususan gumanitar saada, areketlerniñ koordinatsiyası ve leyhalar kenişletilmeli, dep qayd etti», – dep aytıla haberde.
Ceppar, Rusiyeniñ işğal altındaki Qırım sakinlerini qorquzuv siyaseti devam ete, dep qayd etti.
ABD Ukraina elçihanesi qırımtatar sürgünligi yılında muracaatnı aydınlattı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
