Ukraina Tış işler naziriniñ birinci muavini Emine Ceppar İrannıñ Ukraina elçisi Manouchehr Moradi ile körüşti.
Müessiseniñ matbuat hızmeti bildirgenine köre, Ceppar elçige Qırımda Rusiye tarafından insan aqları bozulğanını, Azaq-Qara deñiz regionı askeriyleştirilgenini ve yarımada işğaliniñ toqatıluvınen bağlı Ukrainanıñ halqara şartları aqqında tarif etti.
«İran elçisi Qırımdaki siyasiy ve gumanitar vaziyetni añlağanını bildirip, İrannıñ Ukraina suvereniteti ve topraq bütünligine qol tutqanını tasdıqladı», – dep aytıla haberde.
Qayd etilgenine köre, Ceppar ve Moradi Ukraina ve İrannıñ medeniyet, tasil saalarında işbirligi meselelerini ve BM ve diger halqara teşkilâtlar çerçivesinde iş birliginiñ semerelik yollarını muzakere etkenler.
Ukraina mudafaa naziri Andrey Tarannıñ bildirgenine köre, Qara ve Azaq deñizlerinde Rusiye işğal etken Qırımnıñ askeriyleştirilüvi sebebinden kerginlik arta.
2018 senesi dekabrniñ 17-nde Qırımnıñ askeriyleştirilüvi sebebinden qabul etilgen BM Baş Assambleyasınıñ qararı Rusiyeni Qırımdan askerlerni çıqarmasına çağırıp, Qara ve Azaq deñizlerinde asker sayısınıñ artmasını takbih etmekte.
