Ukrayına Tış işler naziriniñ birinci muavini Emine Ceppar «Qırım platformasınıñ» ilk parlament sammitiniñ iştirakçilerine Ukrayına yırlarını diñlegenleri içün qırımlılar taqip etile, dep tarif etti.
«İşğalci akimiyetniñ agoniyası tamamen kritik. Soñkilerden – Bağçasaraydaki qırımtatar toyu, anda «Çervona kalına» yırı yanğıradı. Neticede Rusiye akimiyeti müessise saibine para cezası berip, onı ekstremist köntentini tarqatqanları içün afu soramağa mecbur etti», – dedi Ceppar.
O, Qırım işğaliniñ ilk qurbanı sayılğan qırımtatarı Reşat Ametovnıñ facialı taqdiri aqqında hatırlattı. Aq qorçalayıcılarnıñ malümatına köre, 2014 senesi martnıñ 3-nde onı yarımada işğaline qarşı bir kişilik narazılıq aktsiyası keçirilgen Aqmescit merkezinde kamuflâjlı urbada kimligi belli olmağan insanlar hırsızladı. Pıçaq yaraları ile cesedi 2014 senesi martnıñ 15-nde Qarasuvbazar rayonında tapıldı.
Ceppar Qırımda 17 yılğa üküm etilgen qırımtatar siyasetçisi ve faali Nariman Celâl aqqında tarif etti. Onıñ aytqanına köre, Rusiye akimiyeti Celâldan «Qırım platforması» ilk sammitini ziyaret etkeni içün intiqam ala.
Bağçasaraydaki Rusiye mahkemesi «Ukrayına milletçileriniñ uruş yırı» dep adlandırğan «Çervona kalına» yırını çaldırğanı içün qırımtatar toy saipleri ve musafirlerini memuriy mesüliyetke celp etti. Qabaatlanğanlar para ve memuriy apis cezalarını aldı. Rusiye Telegram kanalları restoran saibi ve diceyiniñ açıq «afu» videosını derc etti. Toy keçken restoran «teşkerüvge» qapatıldı.
Rusiye mahkemesi «Missis Krım – 2022» Olga Vallevağa para cezasını berip, dostunı «Çervona kalına» Ukrayına yırını icra etkeni içün apiske aldı.
Bu yıl avgust ayında Qırımdaki Rusiye mahkemesi dicey Yuriy Radionovğa 40 biñ ruble para cezasını berdi ve 10 künge apiske aldı. Sebep Şçelkino şeerindeki «Krab» qavesinde YARMAK ukrayın reperiniñ «Dıke pole» yırını qoyğanı oldı. Mahkemede dicey «qabaatını qısmen tanıdı». Onıñ aytqanına köre, Ukrayına yırlarınen video qave musafirlerinden biriniñ sımarışınen qoyuldı, onıñ mündericesini bilmegen eken. Soñra Rusiye mahkemesi «Dıke pole» yırını qoydırğan Dmitriy Gaynanı 50 biñ ruble para cezasını berdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
